Rembist eins og rjúpan

Hvaðan kemur þetta orðatiltæki. Reynir rjúpan að sitja á staur í miklu roki eða hefur þetta einhverja aðra merkingu? Alltaf skemmtilegt að velta þessum hlutum fyrir sér, sérstaklega þegar maður nennir ekki að fletta þeim upp.

Nokkrir dagar síðan ég bloggaði síðast. Ákvað því að henda inn nokkrum setningum. Stefni að því að setja inn fleiri þegar líður á daginn. Lauk við bókina "The fabric of the cosmos - Time, Space and the Texture of Reality" í gærkvöldi. Ótrúlega góð en var orðinn svolítið þreyttur á henni í lokin. Þriggja mánaða ferli að lesa svona bækur. Tók því upp fyrri bók höfundar "Elegant universe". Fjallar nánast um sama efni nema hann hefur leikinn á aðal hugðarefni sínu strengjakenningunni. Sendi ykkur pistla við og við.

Veðrið alltaf yndislegt!?! Skafrenningurinn ætti þó að vera búinn, allt búið að fjúka sem getur fokið. Nú mætti hitastigið fara upp um nokkrar gráður svo hægt sé að þjappa snjóinn á skíðasvæðunum. Þekki einn sem myndi fagna því mikið.

The manic blogger

Það er ekkert auðvelt að halda úti bloggsíðu og láta sér detta eitthvað skemmtilegt í hug á hverjum degi. Eitthvað vandamál er með þjónustuaðilann minn því það náðist ekki samband við hann í fyrradag þegar ég skrifaði þvílíkan pistil um sjónvarpsdagskrána. Las hann svo yfir seinna og komst að því að hann var hundleiðinlegur. Ákvað því að setja hann ekki á síðuna.

Nú snjóar og snjóar. Ekki það besta fyrir okkur hlauparana. Færðin þung, hver kílómetri þyngri en birgðar heimsins en ánægjan er yfirleitt mikil þegar komið er heim. Því erfiðara sem hlaupið verður því meira er lagt inn á reikninginn í þjálfunarbankanum.

Þóra kemur heim í dag eftir þriggja daga útlegð. Hélt hún væri laus við Bechtel hraðlestina. Kom svo í ljós að allt fór í hönk um leið og hún var farin. Hún var búin að vera í burtu í hálfan mánuð þegar neyðarástand myndaðist í þjálfunarmálum. Spurning hvort verður flogið ef færðin er svona slæm. Ef það er álíka snjókoma fyrir austan og hér, þá er spurning með Fagradalinn. Hún verður EKKI ánægð ef hún kemst ekki heim. Það er fátt leiðinlegra en að verða veðurteptur fyrir austun. Austurlandið er ágætis pleis og allt það á góðum degi en hrikalegt þegar þú villt ekki vera þar.

Best ég taki einn stuttan 10 km sprett í ævintýraborginni Reykjavík. Geri það áður en Þóra kemur. Tek svo á móti henni sveittur og sætur þegar hún lendir. Gott plan fyrir daginn. Spurning hvort ég villist?

Er okkur alveg sama

Það er allur vindur úr íslensku samfélagi. Við látum allt yfir okkur ganga. Við erum fámenn þjóð sem heldur þingkosningar á fjögurra ára fresti. Fagurgalinn er mikill rétt fyrir þingkosningar en um leið og úrslit liggja fyrir slitna öll tengsl þingmanna við samfélagið og þeir hefjast handa við að bjarga eigin hagsmunum og troða pyngjuna, nokk sama okkur sem þurfum að lifa þeirra gjörðir frá degi til dags. Að vísu eltu margir Ómar Ragnarsson niður Laugarveginn þegar hann fylgdi sannfæringu sinni og létu vita að þeir væru sammála. Ég held samt að allir hafi vitað að þær aðgerðir voru allt of seint á ferðinni. Það var ekki nokkur leið að snúa við þeim framkvæmdum sem þegar voru risnar, of miklir peningar í húfi.

Nú krefst ég þess að ráðamenn þjóðarinnar geri eitthvað. Við borgum 60% meira fyrir matvöru á Íslandi heldur en í Evrópu. Nú dugir enginn fagurgali og þvoglumæltar fegurðaraðgerðir. Gerið eitthvað í málinu, þetta er alveg óþolandi. Og við hin sem höfum lítil sem engin völd, við verðum að gera eitthvað í málinu og nú er ég opinn fyrir hugmyndum.

Homo Sapiens vs. Homo Fictious

Fimmti janúar er risinn og allt með kyrrum kjörum á Vesturvígstöðunum. Með frið í hjarta og gleði í sinni hélt ég til vinnu í morgun mikið feginn því að hafa loksins tekist að koma blessuðum sólarhringnum aftur á réttan kjöl. Ég jafnframt lofa því að tala ekki frekar um svefnvenjur mínar nema eitthvað skemmtilegt gerist í þeim geiranum.

Las með morgunseríosinu (verð líklega að skilgreina það frá hádegis- og kvöldseríosinu) upphafið af bók sem heitir: "How to write a damn good novel." Fyrsti hluti þeirrar ágætu bókar fjallar um persónusköpun og þá staðreynd að mannverur eru leiðinlegar en skáldsagnapersónur skemmtilegar, athyglisverðar og frábærar. Þær eru sterkari, ríkari, grimmari, miskunnlausari, fallegri, ljótari, stunda meira kynlíf eða hreinlega á allan hátt flottari en við mannfólkið sem virðumst sulla um í meðalmennskunni meira en góðu hófi gegnir. Þess vegna hef ég ákveðið í dag að lifa lífinu eins og Ríkharður Ljónshjarta... (kannski ekki góð hugmynd þar sem hann lifði skírlífi) eða James Bond (úhhh... það er sko nagli sem stundar fullt af kynlífi) eða Bósi Ljósár, Logi Geimgengill eða eða eða...

Ætli ég verði ekki að sætta mig við að vera Meðal-Jón sem gerir aldrei neitt athyglisvert sem birta ætti í bók eða á forsíðum blaða. Þjóðarsál Íslendinga segir þó að maður sé ekki maður með mönnum fyrr en mynd og grein hefur verið birt í DV. Þá fyrst má setja fólk í annála og bera það á torg. Alltaf dreymt t.d. að verða flugdólgur.

Seinni hluta dagsins í dag ætla ég að nota til að þrífa, syngja, hlaupa og sofa. Ég ætla að framkvæma þessa hluti eins og James Bond myndi annast þá. Í svörtum jakkafötum, hvítri skyrtu og lakkskóm ætla ég að skúra og skrúbba allt hátt og lágt. Þetta mun ég gera án þess að svitna eða fá svo mikið sem einn skítablett á fötin. Alveg eins og JB eftir að hann er búinn að drepa þrjátíu, sprengja upp þyrluna og skríða um skólpræsið til að flýja hryðjuverkamennina.

Hallelúja...

Flæði og kulnun

Þriðji janúar leið eins og hver annar dagur. Mætt var til vinnu á skipulagsdegi og þar voru næstu skólavikur skiplagðar með stæl. Hélt þó fyrst að ég væri ruglast þegar ég mætti klukkan 7:30 og allt var slökkt. Var næstum farinn heim að sofa aftur enda sólarhringurinn alveg á hvolfi eftir langt og ljúft frí. Hef ruglast á dögum áður.

Kjörorð dagsins voru flæði og kulnun. Flæði er að gleyma sér í vinnunni af því það er svo gaman. Flæði er að vera að í núinu og uppgötva allt í einu að tíminn hefur liðið allt of hratt af því það var svo mikið jákvætt að gerast. Þeir sem þekkja eitthvað til kennslu vita að allir dagar eru svona ef við njótum þess sem við erum að gera. Það eru alltaf mánudagar og föstudagar í þessu starfi. Hinir dagarnir þjóta framhjá í móðu. Stundum koma þó krumpur eða rifur í flæðið. Þá verður maður neikvæður, pirraður, þreyttur og með allt á hornum sér.

Fjórði janúar og nú kemst þessi dagbók vonandi á rétt ról. Eins og sjá má þá er dagbókin á Hawaii tíma og því eru tímasetningar algjörlega út í hött.

Enn ein andvökunótt. Las um nýjar kenningar um myndun alheimsins. Var eitthvað búinn að tala um himnurnar áður en samkvæmt þessum nýju kenningum er alheimurinn gerður úr þrívíðri himnu sem er haldið saman af orkuríkum strengjum. Annar alheimur gerður úr samskonar himnu er í minna en 1/10 úr millimetra fjarlægð frá okkur. Þessi alheimur er þó í annarri vídd og þess vegna sjáum við hann ekki. Upphaf alheimsins varð þegar bilið á milli þessarra vídda varð skyndilega núll og við það losnaði ofsafengin orka. Himnurnar þöndust út og alheimurinn eins og við þekkjum hann myndaðist smátt og smátt. Eftir okkar daga mun alheimurinn halda áfram að þenjast út og efnið í honum þynnast þangað til hann lítur út fyrir að vera algjörlega kulnaður. Gerist eftir trilljón ár eða svo. Þá munu himnurnar endurtaka leikinn og þenjast út af svipuðum hætti. Eða þannig...

Fræðilegt efni sem hefði í flestum tilfellum dugað til að svæfa flóðhest en ekki mig.

Annars var dagurinn fínn. Krakkarnir skemmtilegir og gaman að vera til. Hvernig voru annars kjörorð gærdagsins - Flæði og Osmósa?

Fríið búið og barningurinn byrjar

Frá áramótum hefur fátt markvert gerst. Nýársdagur leið eins og venjulega við át á afgöngum frá gamlárskvöldi. Einnig var tekið í spil og reynt að vinna upp spilatapið sem við urðum fyrir vegna utanlandsferðar Helgu og Andrésar. Þau ákváðu að halda upp á jólin í Hong Kong, s.s. á stað þar sem engin jól eiga að vera til. Þeirra aðfangadagskvöld fór fram á fimm stjörnu matsölustað og endaði í drykkjukeppni við innfædda þar sem þau sigruðu í öllum flokkum.

Annan janúar gerðist hreinlega ekki neitt. Fór á fætur klukkan 13:10 og hékk yfir sjónvarpinu fram eftir degi. Þrátt fyrir 60 stöðvar var ekkert á dagskrá. Horfðum því á fyrstu Star Wars myndina í 310. skipti og nutum nýrra hljómgæða á nýjustu útgáfunni í heimabíóinu. Fljótlega var dagurinn búinn og komið kvöld enda lítið eftir af deginum þegar við fórum á fætur. Tók einn 10 km sprett um bæinn fyrir kvöldmat í fljúgandi hálku. Þeir sem sjá um að sanda göngustíga og gangstéttar í bænum þurfa að taka sig taki. Það hættulegasta sem þeir geta gert er að skilja eftir eyður í söndun. Við sem förum um á tveimur jafnfljótum erum svo fljót að komast upp á lagið þegar söndunin er í lagi. Fljúgum svo á hausinn þegar skyndilega kemur opið svell. Þetta má ekki gerast. Bechtel hringdi í gær í Þóru. Hún er ekki alveg laus við þá. Hún setti þeim þó afarkosti, ætlar ekki að vera fyrir austan meira en þrjá daga í einu. Spurning hvað InPro segir við því.

Þriðji janúar. Framundan er frekar undarlegur dagur. Er ekki búinn að sofa dúr í alla nótt enda löngu búinn að snúa sólarhringnum við. Eyddi nóttinni við að lesa um strengjakenninguna, hvernig strengirnir tengjast við himnur í alheiminum. Þar lærði ég einnig um nýjustu hugmyndina um þrívíðar himnur (hvernig sem þær líta út) sem við búum í og hvernig þær eru svo hluti af öðrum himnum sem við vitum ekkert um en eru samtímis við hliðina á okkar. Þessu skolaði ég niður með Andrési Önd í morgunsárið ásamt þætti um hlutverk þyrlna í nútímastríði. Tvöfaldur expresso fylgir mér svo vansvefta út í daginn. Mikið ofboðslega verð ég feginn þegar þessu tilgangsleysi líkur. Að vísu er alveg á hreinu að um leið og ég byrja að vinna nenni ég því ekki heldur og þrái að komast í frí aftur. Ég á svo bágt... eða hitt þó heldur.